A Estrada na Rede

 18 deportistas e 9 clubs optarán aos nove galardóns que se
repartirán para estas modalidades.
 Tamén se concederá premiación ao mellor evento deportivo do ano,
á entidade de apoio ao deporte, mencións honoríficas e
recoñecerase a traxectoria ao doutor Juan José Cota.
 Os premiados e premiadas desvelaranse na V Gala do Deporte do
Concello da Estrada, programado para as 20:00 horas do vindeiro
19 de decembro no Teatro Principal.

O Concello da Estrada fai públicos
hoxe os candidatos e candidatas que optarán ás diferentes categorías na V
Gala do Deporte, o vindeiro 19 de decembro.
O xurado reuniuse onte para aprobar as nominacións propostas polo
departamento de Deportes en cada categoría e para deliberar o gañador en
cada unha delas. Os resultados daranse a coñecer na gala, sumados ao xa
coñecido recoñecemento ao doutor Juan José Cota, xefe dos servizos
médicos do Real Club Celta de Vigo.
Ademais, concederanse tres mencións honoríficas a tres persoas ou clubs
vencelladas co ámbito deportivo local que tamén se farán públicos durante a
gala.
Deste xeito, o triatleta, Adrián Picallo, o piloto, David Vázquez e o atleta, El
Mehdi El Nabaoui pelexarán por facerse co galardón ao mellor deportista
masculino deste ano.
Pola súa parte, Carmen Escariz, Dori Carbia e Raquel Miguens farán o
propio na modalidade de mellor deportista feminina.
Na categoría de mellor deportista masculino sub-18 concorrerán Darío
Míguez, do Club Bádminton A Estrada, Samuel Tato, atleta do Club Judo
Base, e Pablo López do Club Tenis RC. Pola contra, en feminino, as
candidatas son Iziar Barcala, do Club Bádminton A Estrada, África Loureiro,
do Club Budoyama Kárate e Natalia Rivas, atleta de marcha atlética.

Os propostos para a distinción de deportista ou club revelación 2023 son a
atleta, Arauia Al Bachere, a tenista Candela Fajardo e o loitador Joel Castro.
Pola súa parte, Xaquín Baldomir, técnico do Club Judo Base, Miguel
Sánchez, do Club Tenis RC, e Manu Brea, do Club Bádminton da Estrada, son
os nominados a mellor adestrador.
No referente ao mellor clubs de base, os candidatos son o Club Tenis de
Mesa Top Spin, que durante este ano contou con 30 licencias, o Atletismo A
Estrada, con 106 licencias, e o Club Judo Base, que dispuxo de 90.
O premio ao mellor equipo rifarase entre o CNS cadete masculino, o equipo
máster do Sincroburbullas e o conxunto benxamín A do EEFB.
As entidades nominadas para recoñecer o seu apoio ao deporte local son
Strada CB, Edente Estudio Dental e Grupo Habita Servicios/Inversia
Insurance.
Finalmente, tamén se resolverá cal foi o mellor evento deportivo do 2023
entre o XVIII Memorial Manuel Coto Ferreiro que enfrontou ao Estrada Futsal
co Pescados Rubén Burela F.S, a XXV Ruta BTT do Salmón, na que este ano
se deron cita 520 participantes, ou o Campionato Galego de Ximnasia de
Trampolin que contou coa participación de ximnastas mundialistas.

O departamento de Cultura do Concello da Estrada informa de que xa se
esgotaron as entradas para o musical infantil de nadal OS TRES
PORQUIÑOS que terá lugar o 27 de decembro ás 17.30 horas.

 A compañía acaba de programar un segundo pase para as 19.30 horas.
Poderanse recoller as entradas no departamento de Cultura do Concello
ou na plataforma atquilla.com.

Por outra banda, xa se vendeu tamén a metade do aforo do espectáculo
‘CUENTO DE NAVIDAD’ previsto para o día 2 de xaneiro. Aínda se poden
mercar entradas no departamento de Cultura ou na plataforma
giglon.com. As entradas teñen un custo de 6,00€

 A concelleira de Benestar Social, Igualdade e Educación, Amalia
Goldar, foi a encargada de ler o manifesto polo 25N, o cal fora
aprobado en pleno polo PP, PSOE e MÓVETE.

Educación, prevención, sensibilización
e cooperación interinsitucional. Estas son algunhas das pezas “claves” para
acabar coa violencia de xénero. Así o confirmou, esta tarde, a concelleira de
Benestar Social, Igualdade e Educación, Amalia Goldar, durante o acto central
polo 25N.
A edil foi a encargada de ler o manifesto institucional polo Día Internacional da
Eliminación da Violencia contra a Muller, un escrito que fora aprobado en pleno
polo PP, PSOE e MÓVETE. No mesmo, os concelleiros e concelleiras destes
grupos amosaron o seu compromiso unánime na loita contra a violencia
machista.
“Como axentes de primeira liña, os concellos somos en moitos casos clave
para identificar, atender e acompañar ás vítimas”, explicou a concelleira. Tendo
iso en conta, a edil apuntou que A Estrada implantou, nos últimos anos, varias
medidas para previr esta lacra social. Entre elas, destacou a sinatura do
Protocolo de Colaboración para o impulso da Rede de Entidades Locais contra
a Violencia de Xénero coa Xunta, así como a constitución e activación das
Mesas Locais de Coordinación Interinstitucional.
Como avanzou a concelleira, o Concello continuará apostando por esta
cooperación entre distintas administracións. Tanto é así, que A Estrada
promoverá a continuidade da Mesa Local contra a Violencia de Xénero e,
ademais, instará ao Goberno central a cumprir o Pacto de Estado contra a
violencia de xénero para adoptar as medidas recollidas en materia de
prevención, detección e atención integral.

 A iniciativa vai dirixida a rapaces e rapazas con idades
comprendidas entre os 3 e 12 anos, escolarizados e empadroados
no Concello da Estrada.
 O prazo para inscribirse irá desde o 27 de novembro ata o 15 de
decembro, ambos incluídos, nas dependencias de Servizos Sociais
ou na sede electrónica municipal.

O Concello da Estrada promove a
conciliación durante as vacacións de Nadal a través da convocatoria dos
Campamentos de Nadal 2023.
A iniciativa terá un total de 40 prazas dirixidas a rapaces e rapazas con idades
comprendidas entre os 3 e 12 anos, escolarizados e empadroados no Concello
da Estrada. 30 deles acudirán ás instalacións de SOEI e 10 ao Espazo
Concilia, e as sesións desenvolverase en horario de 08:30 a 14:30 horas os
días 22,26,27,28 e 29 de decembro e 2, 3, 4, e 5 de xaneiro.
Cada inscrición terá un prezo de 26 euros e o prazo para formalizalas irá desde
o 27 de novembro ata o 15 de decembro, ambos días incluídos.
No caso do segundo membro da unidade familiar inscrito farase un desconto
do 20%, e a partir do terceiro será de balde.
As solicitudes de inscrición deberán presentarse no Departamento de Servizos
Sociais do Concello da Estrada, en horario de 9:00 a 14:00 horas de luns a
venres, ou a través da sede electrónica municipal.

O presidente provincial asinou un convenio de colaboración, enmarcado no programa
PON2030, co alcalde Jose López que reafirma a aposta estratéxica polo deporte

O presidente da Deputación de Pontevedra, Luis López, recibiu no seu despacho do Pazo
Provincial ao alcalde da Estrada, Jose López, para asinar un convenio de colaboración enmarcado no
Programa Provincial de Infraestruturas e Dotacións Singulares para a Execución da Axenda 2030 (PON2030)
a través do cal o goberno provincial financiará cun millón de euros, o 50 % do orzamento, os traballos para
a construción dun módulo polideportivo cuberto para a práctica do atletismo e modalidades de loita. O
Concello, pola súa banda, achega o 50 % restante, outro millón de euros. Este acordo supón un novo
exemplo de colaboración entre o executivo provincial e, neste caso, o Concello da Estrada que reafirma a
aposta polo deporte como unha área estratéxica da acción do goberno da Deputación.
A obra, valorada nun total de dous millóns de euros, servirá para reforzar a área deportiva do municipio da
Estrada coa construción dunha nova infraestrutura polideportiva da que a provincia carecía. Trátase da
edificación dun módulo de tres plantas: semisótano, entreplanta e planta baixa; que albergará un recinto
para a práctica de deportes de combate como a loita, judo, taekwondo ou karate, así como un ximnasio no
andar máis baixo. Os vestiarios, cuartos de baños e instalacións eléctricas estarán no segundo nivel.
Mentres que na planta baixa instalarase a pista de atletismo cuberta así como un almacén con diverso
material deportivo. Esta construción servirá para conectar as novas pistas de atletismo ao aire libre coa
piscina da Axencia Galega de Seguridade Pública. Un proxecto millonario que consolida ao Concello de A
Estrada como referencia provincial en canto a instalacións deportivas e que abre á porta á organización de
competicións internacionais ou a acollida de concentracións preparatorias de deportistas profesionais no
municipio.
Segundo recolle o convenio, as obras deberán estar rematadas antes do 30 de abril de 2025. A sinatura
deste protocolo entre Deputación e Concello de Meis realízase coa modificación das bases do programa
PON2030 xa en vigor. Unha modificación que fai compatible a achega da Deputación coas subvencións
doutras administracións sen que o montante concedido ao Concello polo goberno provincial se vexa
reducido.
Un acordo entre a Deputación e o Concello da Estrada que, como recolle o Orzamento provincial do
próximo ano cun incremento dun 19 %, ata os 5,5 millóns da partida destinada a Deporte e o xa aprobado
Plan Extraordinario de Infraestruturas Deportivas dotado con 4 millóns, confirma o carácter estratéxico

desta área de goberno. Ademais supón un novo exemplo de municipalismo ao colaborar co Concello para
executar unha obra que transforma e potencia a rede de instalacións deportivas no interior da provincia.

 A actividade será a partir das 20:30 horas e as entradas serán de
balde ata completar aforo.

O Teatro Principal da Estrada acollerá
este xoves, ás 20.30 horas, un novo paraladoiro literario, esta vez da man da
poeta Yolanda Castaño, quen vén de gañar neste 2023 o Premio Nacional de
Poesía, grazas á súa obra ‘Materia’.
Nada en Santiago de Compostela, Yolanda Castaño, é unha das grandes
referentes da poesía galega contemporánea. Na súa visita ao Teatro Principal,
compartirá con todos os asistentes vivencias sobre a súa traxectoria vital e
literaria. Ademais, o acto irá acompañado dunha sinatura do poemario ‘Materia’
que este ano tamén recibiu o Premio da Crítica ao mellor libro publicado en
lingua galega durante o ano 2022.
As persoas que desexen acudir poderán facelo de balde ata completar a
totalidade do aforo da sala.