A Estrada na Rede

A deputada de Turismo, Nava Castro, enxalza a proposta conxunta dos seis
concellos da provincia por onde pasa a ruta para obter esta distinción:
“Sumando accións como o impulso deste novo itinerario seguimos a

posicionarnos como destino de referencia”

A deputada provincial de Turismo, Nava Castro, referendou hoxe nun acto no
Palacete das Mendoza o apoio da Deputación de Pontevedra á proposta conxunta
dos concellos de Cerdedo-Cotobade, A Estrada, Salvaterra, Pazos de Borbén,
Ponteareas e Ponte Caldelas para solicitar á Xunta de Galicia a declaración do
Camiño de Taverneiro como Vía Cultural. Con esta iniciativa, os municipios polos que
discorre este novo itinerario estreado o pasado ano buscan impulsar a promoción e
divulgación dunha ruta que, como subliñou Castro, “ofrece un patrimonio cultural,
relixioso e cultural moi amplo ao longo dos seus 130 quilómetros”. Neste acto, a
deputada e tamén alcaldesa de Ponteareas estivo acompañada de Jorge Cubela,
alcalde de Cerdedo-Cotobade e deputado provincial de Cooperación, así como de
Marta Valcárcel, alcaldesa de Salvaterra de Miño; Xosé Luciano Otero, alcalde de
Pazos de Borbén; Andrés Díaz, alcalde de Ponte Caldelas e Juan Manuel Constenla,
tenente de alcalde da Estrada.
Na súa intervención, Nava Castro destacou a importancia desta iniciativa, “que une a
seis concellos desta provincia en torno á cultura, ao patrimonio e tamén á proxección
turística que vai supoñer xa contar con este novo camiño cara Compostela”. “Traballar
unidos, sumando sinerxías, é sempre garantía de éxito –indicou-. E hoxe estamos a
dar xuntos estes primeiros pasos para que este novo roteiro, cuxo trazado é froito de
moita investigación e documentación, se coñeza, se divulgue e amose ás persoas que
o camiñen o gran atractivo que ten a nosa provincia no seu interior”. “Pontevedra é
desfrutar! –engadiu-. Por iso suxerimos esta nova alternativa. Sabemos que temos
unha oferta paisaxística, gastronómica, cultural e patrimonial moi difícil de igualar. E
sumando accións como o impulso deste novo itinerario seguimos a posicionarnos
como destino de referencia en torno aos Camiños a Santiago”.
A deputada provincial remarcou que “este viario cumpre á perfección todas as
condicións para obter a declaración como Vía Cultural”, destacando a presenza de 30
igrexas, 14 petos de ánimas, numerosos cruceiros e una ampla lista de contornas
culturais e naturais ao longo do seu percorrido. Neste senso, Castro amosou o
compromiso da institución “coa terra, coa cultura, as tradicións e a nosa identidade” e
incidiu en que para a Administración provincial “é unha obriga seguir a impulsar todas

aquelas accións que nos poñen en valor, nos promocionan e sitúan no mundo” como
a nova proposta do Camiño de Taverneiro, lembrando que desde Turismo Rías
Baixas estase a traballar para divulgar e dar a coñecer todos e cada un dos camiños
xacobeos que transcorren pola provincia.
O Concello de Salvaterra xa aprobou a proposta para dirixirse á Dirección Xeral de
Patrimonio Cultural a fin de que incoe o expediente para a declaración de Vía Cultural
e esta mesma tarde Ponteareas levará este asunto ao seu pleno, de xeito que a idea
é que a próxima semana estean aprobadas as propostas polas corporacións dos seis
concellos. Este é o primeiro paso para as conversas coa Xunta, nas que se quere
implicar tamén aos investigadores que recuperaron a ruta. Ademais, Nava Castro
emprazou aos representantes municipais a unha presentación conxunta do Camiño
de Taverneiro na próxima edición da feira Fitur en Madrid.
Durante o acto, amosouse a guía que Carlos da Barreira e Luis Ferro elaboraron
sobre esta nova ruta. “Camiño de Taverneiro. Guía do Peregrino” ofrece en 185
páxinas a cor toda a información detallada sobre a ruta, distancias, lugares para
durmir e datos sobre o patrimonio natural e cultural, así como datos etnográficos para
as persoas que se decidan a facer esta ruta, que debe o seu nome a Ignacio
Taverneiro, un peregrino veciño de Ponte Caldelas, que faleceu en 1784 na Estrada
despois de realizar o percorrido. Neste senso, a deputada provincial salientou o arduo
traballo de investigación promovido por ambos autores para recuperar esta ruta:
“Estamos a ver, grazas ao traballo de moitos colectivos e moitos investigadores e
expertos, que existen outras vías, descoñecidas ata tempos recentes e que, como
esta, tamén foron utilizadas e hai que impulsar, promocionar e dar a coñecer”,
apuntou.
O camiño conta con 5 etapas entre Salvaterra e Compostela, cun total de 130
quilómetros e nos últimos dous anos foi percorrido por máis de 200 persoas, tanto a
pé como a cabalo e en bicicleta. A primeira destas etapas, de 24 km, arranca en
Salvaterra e transcorre ata Padróns (Ponteareas), á que segue unha segunda de 26
km desde este lugar a Ponte Caldelas. A partir deste punto continúa nunha terceira
etapa de 25 km ata Pedre (Cerdedo-Cotobade), a cuarta (24km) entre Pedre e A
Estrada e por último, desde este concello sae a quinta etapa, de 31km cara a
Santiago.

 A terceira edición deste festival de carácter gratuíto, organizado pola produtora musical dotbeat! conta co patrocinio da Xunta de Galicia e a colaboración do Concello da Estrada.

Con vontade continuísta, a organización apostou novamente por un evento paritario tanto enriba como debaixo do escenario e un cartel formado por máis dunha decena de artistas de diferentes tendencias musicais.

Este evento trata de ser un escaparate para recoñecer a valía de bandas e artistas noveis seleccionando as propostas máis xenuinas da nosa terra e integrándoas en espazos urbanos para poñer en valor a creación musical a plena luz do día.

En definitiva, O Son dos Arrieiros pretende amosar que é posible formular propostas de éxito en clave territorial e brindando a oportunidade de coñecer os cabezas de cartel do mañá que non teñen cabida en outros festivais.

A festa inaugúrouse o venres 22 de setembro ás 20:30 horas na Rúa Calvo Sotelo co concerto de Carolina Rubirosa, unha das artistas con maior proxección de Galicia que presentará o seu novo e ambicioso disco «Tierra de Nadie».

Continúou o sábado 23 de setembro cunha extensa xornada de doce horas de música ininterrumpida ubicada íntegramente na carballeira do Campo da Feira.

Dando o pistoletazo de saída ás 13:00 horas estará enriba do escenario Xacobeo o grupo Guezos, sucedidos ás 14:00 horas por Djow no escenario Galicia, as seguintes actuacións serán as de Rayo Taser (15:00 horas), o dj Maefield (16:00 e 18:00 horas), hydn (17:00 horas),

Playa Desmayo (19:00 horas), Babykatze (20:00 horas), Malandrómeda (21:00 horas), Elba (22:00 horas), Boyanka Kostova (23:00 horas) e o broche final da dj residente do festival ás 00:00 horas con Señora dj.

Nesta tercera edición seguimos crecendo na calidade dos artistas programados, mostrando as novas tendencias  en todos os estilos, e apostando pola calidade da creación en Galicia.
O público segue apoiando o festival, ao que cada vez se achega máis xente de fora, e continuamos na escoita activa da audiencia para atopar a fórmula perfecta para que O son dos arrieiros se asente definitivamente no mapa de festivais de Galicia, declaraba a súa organizadora Patricia á este medio.

O concelleiro de Cultura, Juan Constenla, presentou, esta mañá, as
propostas que se levarán a cabo no Teatro Principal entre os meses
de setembro e xaneiro.

O Teatro Principal da Estrada
converterase, neste último trimestre do ano, no escenario de máis dunha
vintena de actividades culturais de diferentes disciplinas e para todas as
idades. A través do programa A Estrada Escena, a Concellería de Cultura
levará a cabo 22 propostas como representacións teatrais, concertos,
parladoiros, etc. O concelleiro de Cultura, Juan Constenla, explicou, esta mañá,
a oferta cultural, incidindo en que se apostou por "diferentes xéneros e
formatos para chegar á meirante parte da veciñanza, ofrecendo actividades de
calidade e asequibles".
No apartado de música e danza, destacan algunhas das citas anuais e que o
concelleiro definiu como "obrigadas". En concreto, Constenla enumerou o XVI
Encontro Folk Lume na Lareira (12 de novembro, ás 18.00 horas), o concerto
de Santa Cecilia a cargo da Banda Municipal da Estrada (sábado, 25 de
novembro, ás 20.30 horas) e os recitais de Nadal e Fin de Ano por parte do
alumnado do obradoiro de música moderna Carlos Barruso (22 de decembro
ás 21.00 horas e 23 de decembro ás 20.30 horas, respectivamente), entre
outras propostas. En canto á danza, destacará a visita da compañía Greta Marí
(3 de novembro, ás 21.00 horas).
Na disciplina de teatro haberá actuacións para público infantil e familiar e
tamén para adultos. Entre as posibilidades despuntan o espectáculo Son no
Berce da compañía A Cova das Letras (14 de outubro, ás 12.30 horas). A
maiores, Náufragos Teatro chegará ao municipio con Hugo o día 2 de
decembro, ás 12.30 horas. A época de Nadal traerá consigo a representación
de funcións propias da época como, por exemplo, Cuento de Navidad por parte
do grupo Cía La Bicicleta (2 de xaneiro, ás 17.30 e ás 19.30 horas). Os máis
maiores terán tamén ocasión de gozar de Deadpan Karaoke, o novo
espectáculo da compañía Ibuprofeno Teatro (30 de setembro, ás 20.30 horas).
A isto hai que sumar, así mesmo, a visita de dous dos grandes expoñentes da
comedia: Leo Bassi (6 de outubro, ás 21.00 horas) e de Rafael Álvarez (27 de
outubro, ás 21.00 horas).

Como avanzou o concelleiro, a muller será a gran protagonista
no mes de novembro, con representacións teatrais como a obra Santa Inés (10
de novembro, ás 21.00 horas) ou As alumnas (17 de novembro, ás 21.00
horas).
O programa verase completado, así mesmo, polos parladoiros a cargo do actor
e director, Quico Cadaval, (2 de novembro, ás 20.30 horas) e da escritora,
Yolanda Castaño, (23 de novembro, ás 20.30 horas).
Todas as actividades se poderán consultar na páxina web e na app do Concello
da Estrada.

A sala de xuntas do Concello da Estrada
acolleu esta mañá a entrega do Premio de Álbum Ilustrado ‘Alberte Quiñoi’ á
autora Laura Cid Rascado pola súa obra ‘Maruchi e o gancho’, que foi
presentada no mesmo acto.
Acompañando á escritora e ilustradora estiveron o concelleiro de Cultura, Juan
Manuel Constenla, e o director de produción da Editorial Galaxia, Xesús
Domínguez.
Cid Rascado inspirouse nunha familiar súa, Maruchi, para realizar esta peza,
na que conxuga á perfección tenrura, humor e perspicacia, como destacou o
xurado do Premio de Álbum Ilustrado ‘Alberte Quiñoi’ á hora de ditaminar o
veredicto final. O galardón foi convocado, por terceiro ano consecutivo, polo
Concello da Estrada en colaboración coa Secretaría Xeral de Política
Lingüística e da Editorial Galaxia.
A peza, que se atopa á venda nas librarías desde o pasado mes de xuño, conta
a particular historia de Maruchi e a súa paixón por tecer. Naceu, tal e como
describiu a autora na presentación, coma unha “casualidade”: o seu amor polo
arte levouna a realizar ilustracións de animais que conteñen as características
das persoas nas que se inspira. Así pintou por primeira vez á protagonista,
unha galiña.
No acto, Constenla agradeceu a participación de todas as persoas neste
concurso, que naceu, afirmou, co obxectivo de “incentivar a creatividade dos
novos e novas autores e que sirva, ademais, de escaparate para dar a coñecer
o seu traballo ao público”. Ademais, reivindicou o “compromiso do Concello da
Estrada coa cultura, con máis de cinco premios literarios convocados ano tras
ano” e que son unha oportunidade para as novas promesas.

Finalizou a intervención dándolle os parabéns á “gran protagonista” da
xornada, Laura, pola súa marabillosa obra e animou a todos os pequenos e
pequenas a lela.
Pola súa parte, Xesús Domínguez quixo agradecer o labor desenvolto e o
“compromiso coa cultura” que hai desde o departamento de Cultura do
Concello da Estrada.

 A cita será este domingo, 24 de setembro, ás 19.00 horas na praza
do Concello.

Xuntar 500 voces enriba dun escenario
non é tarefa fácil, pero iso será o que A Estrada vivirá este domingo, 24 de
setembro, da man da XVII Romaría Coral. A cita, cuxa presentación tivo lugar
hoxe, está organizada pola Federación Coral Galega (Fecoga) en colaboración
do Concello e a Consellería de Cultura da Xunta. Na mesma interviñeron o edil
de Cultura, Juan Constenla, o director xeral de Cultura da Xunta, Anxo
Lorenzo, o presidente de Fecoga, Antonio Rey, e o presidente da Coral
Polifónica de berres, Manuel Villar.
O concelleiro de Cultura, Juan Constenla, sinalou o “orgullo que supón para o
Concello acoller o evento coral máis importante de toda Galicia”. O edil
explicou que a cita contará con representación das agrupacións da Estrada.
Así, tomarán parte máis dunha vintena corais de toda Galicia e, entre elas, está
prevista a actuación da Coral Polifónica Estrandense e da Coral Polifónica de
Berres, así como da Banda de Música Municipal da Estrada. Na mesma liña, o
director xeral de Cultura subliñou a importancia deste tipo de eventos para pór
en valor “unha parte importante da nosa cultura popular”.
O concerto arrincará o domingo, día 24, ás 19.00 horas na praza do Concello.
No mesmo tomarán parte 21 corais procedentes de toda a xeografía galega. En
total, interpretaranse oito pezas a capela e outros tres temas nos que os
cantantes estarán acompañados pola Banda de Música da Estrada.

Tequexetéldere iniciou, esta semana, unha serie de concertos didácticos que terán lugar en todos os centros de ensino primario do concello.