A Estrada na Rede

Asociacións de veciños, de mulleres rurais e comunidades de augas
están chamados ao encontro, que se celebrará o xoves, ás 19.30 horas,
no MOME.
 Informarase sobre o Plan Provincia Comunitaria, Plan +Aqua e Plan
+Novaqua.
 O Concello adianta a posta a disposición de asesoramento na
tramitación das axudas.

O Concello da Estrada e a Deputación de Pontevedra
teñen convocada para este xoves, 29 de xaneiro, unha reunión informativa con
colectivos e asociacións estradenses en relación ao Plan Provincia Comunitaria, Plan
+Aqua e Plan +Novaqua correspondentes ao exercicio 2026. O alcalde, Gonzalo Louzao,
explicou que o que se busca con este encontro e informar a asociacións de veciños,
asociacións de mulleres rurais e comunidades de usuarios de augas para que poidan
coñecer de primeira man as bases que rexen estas novas convocatorias.
O rexedor trasladou xa o compromiso do Concello de implicarse para axudar a estas
asociacións na tramitación necesaria para conseguir uns fondos que axudarán a estas
entidades a seguir mellorando locais sociais nas parroquias, así como a renovar ou
acometer novas traídas de auga.
A reunión informativa celebrarse no MOME, ás 19.30 horas. O alcalde explicou que no
Plan Provincia Comunitaria as asociacións estradenses aspiran a acceder a 500.000
euros en axudas para a mellora e equipamento dos seus locais. Anticipou o rexedor que,
pola súa parte, o Concello implicarase novamente na convocatoria de 2026. De feito, o
rexedor lembrou que o Concello da Estrada respaldou ás asociacións en todo o proceso
de tramitación das axudas de 2025 a través dos seus departamentos de Urbanismo e
Subvencións.
Ademais de orientalos e acompañalos no trámite de solicitude, dende a administración
municipal asumiuse a elaboración das memorias técnicas para que os colectivos non
tivesen que afrontar gastos. Deste xeito, o Plan de Acción Comunitaria supuxo o

investimento de 480.000 euros no rural estradense. A esta contía hai que engadir os
fondos procedentes da liña de axudas que, para esta mesa finalidade, ten a Xunta de
Galicia. Isto fai que estas infraestruturas das parroquias atraeran un investimento
próximo aos 700.000 euros.
O Plan +Aqua está dirixido a comunidades de usuarios de aguas para axudar a sufragar os
gastos de investimentos destinados a mellorar, en termos cualitativos e cuantitativos, a
calidade da auga e o estado das instalacións de captación, potabilización,
abastecemento e almacenamento de augas de consumo deste colectivos. O alcalde
puxo o acento en que, nestes casos, a axuda pode chegar aos 10.000 euros por entidade
solicitante.
No caso do Plan +Novaqua, a Deputación de Pontevedra axudará a comunidades de
usuarios de augas a facer fronte aos gastos destinados a legalizar novas concesións de
augas de consumo humano ou novación das existentes.

 O alcalde acode en Toedo a unha reunión de coordinación con estes
servizos, aos que se suman as brigadas de Obras, que están preparadas
con maquinaria pesada e bombeos para actuar ante posibles incidencias.
 “Temos máis medios pero pedimos tamén máis colaboración cidadá para
evitar riscos”, sinala Gonzalo Louzao.

O alcalde da Estrada, Gonzalo Louzao, desprazouse a
primeira hora desta mañá ata a sede do servizo Emerxencias A Estrada, emprazada en
Toedo, para asistir a unha reunión de coordinación entre esta unidade, os traballadores
de Obras a os axentes da Policía Local, con motivo da alerta meteorolóxica vermella por
fortes choivas no interior da provincia de Pontevedra que comprende o termo municipal
estradense.
A reunión serviu para avaliar a situación, comezando por recoñecer o carácter
extraordinario da mesma. “Actívase esta situación por primeira vez en máis de 20 anos”,
incidiu o alcalde. Foi o propio Gonzalo Louzao o encargado de sinalar que este nivel de
alerta meteorolóxica aconsellou ao Concello afrontala duplicando o servizo de
Emerxencias A Estrada e reforzando tamén o da Policía Local, facendo que o persoal das
brigadas de Obras estean dende primeira hora desta mañá tamén en alerta con
maquinaria pesada e servizos de bombeo para intervir ante as posibles incidencias que
poidan derivarse deste episodio de chuvias tan intensas.
O alcalde confirmou que en Emerxencias se duplicou o número de traballadores por
quenda, en principio, ata a medianoite de hoxe, de xeito que coincidirían seis na base. A
maiores, a Policía Local saíu esta mañá con sete efectivos á rúa. “Teño que agradecer que
houbo persoal que se ofreceu ao incorporarse de xeito inmediato ao servizo cando se
activou a alerta para hoxe”, apuntou o rexedor.
Gonzalo Louzao puxo o acento en que, aínda que ata este mediodía non se produciran
situacións graves a consecuencia da excepcional situación meteorolóxica, o escenario
podería verse complicado conforme avance a xornada, tendo en conta que as previsións
apuntan acumulacións que poderían superar os 140 litros por metro cadrado nas

próximas horas. “E chove sobre mollado”, incidiu o mandatario. Sinalou tamén que se
agarda que a forza do vento se incremente durante a tarde.
“Temos máis medios pero pedimos tamén máis colaboración cidadá para evitar riscos”,
apuntou o mandatario estradense, que percibiu que os avisos lanzados a última tarde do
domingo tiveron efecto nunha redución circulatoria.
Despois de lembrar que a instalacións deportivas municipais permanecerán pechadas
hoxe, ao igual que servizos como a Escola Infantil Municipal ou o Espazo Concilia, Louzao
Dono quixo aproveitar para lembrar aos estradenses a importancia de que eviten
desprazamentos innecesarios ou de que non se acheguen aos leitos fluviais nin zonas
inundables.

 Vehículos que estacionan pegados aos contedores imposibilitan a
mobilización destes puntos de depósito, como sucedeu estes días na
Avenida de Santiago.
 O Concello valora configurar as illas de colectores para que nos
extremos queden os de cartón e vidro, que se baleiran con grúa.

Apoiándose en imaxes que falan por si soas, o
concelleiro de Servizos Municipais, Óscar Durán, solicitou hoxe a colaboración cidadá
para evitar situacións que imposibilitan e interrompen o servizo de recollida de lixo en
distintas rúas do casco urbano. Estas mesmas imaxes permitiron ao edil ofrecer unha
incontestable explicación á presenza de contedores que non puideron ser baleirados nos
últimos días en puntos como a Avenida de Santiago.
As imaxes poñen en evidencia unha situación que imposibilita ou engade riscos de danos
materiais á manexabilidade dos contedores de lixo: vehículos que estacionan moi
pegados os contedores, ás veces mesmo quedando en contacto directo con estes
equipos. Esta situación fai que a empresa encargada de efectuar a recollida non poida
mobilizar determinados colectores co brazo de carga ou remate -ao facelo para poder
prestar o servizo de recollida do lixo- por expoñerse a ocasionar danos nos vehículos que
estacionan sen deixar distancia de seguridade.
Óscar Durán informou hoxe de que, ante situación, o servizo está valorando a
posibilidade de cambiar o deseño das illas de contedores, de maneira que nos seus
extremos queden colocados colectores para a recollida de cartón ou de vidro, xa que
nestes dous casos son unidades que se mobilizan facendo uso de grúa.
En todo caso, en consideración con que esta disposición non sempre é factible, o
responsable de Servizos Municipais fixo un chamamento aos veciños para que non
estacionen os seus vehículos de xeito que entorpezan o manexo dos contedores.
Lembrou Óscar Durán que os equipos verdes se recollen todos os días, baleirándose os
de plástico tres veces á semana. Sinalou que, no caso de que se impida esta recollida e

coincida a continuación un dos días sen servizo, o tempo de permanencia do lixo no
contedor se incrementa, reducíndose a súa capacidade para acoller novos depósitos.

A conselleira do Medio Rural, María José Gómez, acompañada polo director xeral de Gandaría, Agricultura e Industrias Agroalimentarias, José Balseiros, participou hoxe na xornada RuralMente, organizada polo Consello da Estrada co sector primario da zona, onde puxo en valor as políticas a prol da remuda xeracional impulsadas desde o seu departamento, e que se reforzará este ano.

Neste sentido, explicou o impulso ao Plan de remuda centrado sobre varias liñas de traballo. Entre elas, as achegas para a incorporacións de mozos ao agro e os plans de mellora de explotacións, coas que se apoia o desenvolvemento do seu plan empresarial. A conselleira salientou que grazas a estas subvención, máis de 5.000 mozos puideron incorporarse á actividade agrogandeira desde 2009. Unha liña de axudas que, tal e como manifestou, terá continuidade neste 2026.

A maiores, a titular de Medio Rural tamén fixo fincapé noutra iniciativa posta en marcha o pasado ano, o Banco de Explotacións. Detallou que esta ferramenta favorece o contacto entre titulares de explotacións que cesan ou van cesar a súa actividade e os interesados en asumir a súa xestión, mediante compra ou arrendamento. Ademais, resaltou que este proceso fomentarase cunha liña de axudas específica cunha achega de 2,1 millóns de euros ata 2029. Actualmente son sete explotacións as dispoñibles no Banco, unha das cales se corresponde cunha granxa avícola da Estrada.

O programa de titorización e o asesoramento é outra das liñas de traballo para favorecer a remuda e, neste ámbito, a conselleira explicou que desde a súa posta en marcha no ano 2024 beneficiou xa un total de 544 persoas que solicitaron as axudas de incorporación. Estes beneficiarios foron atendidos e acompañados por 48 titores, profesionais das oficinas rurais dependentes da Xunta. Gómez indicou que este programa terá continuidade ao longo deste 2026 cun incremento do seu orzamento, pasando de 400.000 euros a case 850.000.

Por último, a conselleira salientou a relevancia da formación para garantir a remuda xeracional. Neste sentido, explicou que a Consellería dispón de seis centros de formación e experimentación agraria nos que este curso se matricularon 566 alumnos, un 9 % máis con respecto ao anterior.

GALERÍA :

.

 “Escanciar na Estrada non é un hábito de adopción, senón unha mostra
de tradición”, sinala o alcalde, Gonzalo Louzao.
 “Necesitabamos un fío que cosa todo este patrimonio: ese é o cometido
da Ruta da Sidra”, di ao referirse á fonda tradición do cultivo da mazá e
á revitalización de cultura sidreira local.
 Aplaude durante o discurso o acertada que foi a aposta do sector
estradense por amparar os seus pomares coa certificación ecolóxica:
“hoxe A Estrada ostenta o récord europeo na produción de mazá
ecolóxica para sidra”.
 A pretensión é que a sinalización da ruta estea lista para a vindeira Feira
da Sidra.

“Gustaríame aproveitar hoxe este escaparate
internacional do turismo que é FITUR para presentar un proxecto que leva anos
xermolando, medrando e florecendo no noso municipio: a Ruta da Sidra”. Con estas
palabras comezou este mediodía o alcalde da Estrada, Gonzalo Louzao Dono, a
presentación deste percorrido turístico no espazo expositivo correspondente a Galicia.
O Concello da Estrada escolleu o lema “Unha tradición que medra, un futuro que
fermenta” para dar a coñecer unha Ruta da Sidra chamada a converterse no fío que cosa
a tradición local do cultivo da mazá e da elaboración da sidra co aproveitamento do
potencial e tirón turístico que demostra ter este sector.
“Escanciar na Estrada non é un hábito de adopción, senón unha mostra de tradición”,
dixo Louzao. O rexedor aproveitou esta reflexión para sinalar a fonda tradición que o
cultivo da mazá e da elaboración de sidra teñen na Estrada. Lembrou de seguido que,
máis de dúas décadas atrás, comezou a revitalizarse este legado coa proliferación de
pomares en todo o territorio.
“Xurdiu tamén o asociacionismo entre os produtores locais, que adoptaron a sabia
decisión de apostar por que a mazá que medra na Estrada o faga ao abeiro da
certificación ecolóxica”, subliñou o alcalde, antes de presumir ante todos os presentes

das máis de 120 hectáreas que plantacións de maceiras en produción existentes neste
municipio ou dos arredor de 2 millóns de quilos de mazá que se recollen nas boas
campañas e que se destinan á elaboración da sidra.
Logo de sinalar que A Estrada ostenta o récord europeo na produción de mazá ecolóxica
para sidra, o alcalde destacou que toda esta produción fornece mazá para a exportación,
pero tamén materia prima para abastecer os lagares locais que se crearon nestes anos,
moitos deles recuperando unha antiga experiencia familiar. Falar de lagares levou a
Gonzalo Louzao a referirse á Feira da Sidra, “un evento que converteu á Estrada na
capital galega da sidra e en referente para o noroeste peninsular». “Cada ano son
milleiros de litros de sidra os que se catan e en cada edición pulverízanse todas as
marcas, tanto de lagares presentes como de público asistente”, presumiu o rexedor.
“Entenderán que tendo unha tradición que medra e un futuro que fermenta,
necesitamos un fío que cosa todo este patrimonio: ese é o cometido da Ruta da Sidra”,
explicou o alcalde estradense. Foi despois cando puxo o acento en que, experiencias
doutras comunidades e países poñen de manifesto que “a sidricultura ten unha vertente
turística innegable”. “A Estrada non pode deixar pasar a oportunidade de aproveitala”,
apostilou.
Gonzalo Louzao avanzou a intención de que a Ruta da Sidra estea marcada para a
vindeira edición da Feira da Sidra da Estrada. Animou aos presentes, entre os que se
atopaban integrantes do sector estradense, a desfrutar os diferentes momentos que
marca o propio proceso produtivo. “Non hai por que escoller: veñan gozalos todos”,
concluíu

 Daralle a mesma estética aplicada ao tramo que conflúe con Marqués de
la Vega de Armijo, que tamén loce xa empedrada.
 A única diferenza é que esta segunda parte será transitable, mentres que
a primeira pasou a ser peonil con esta reforma.
 As obras na Praza de Galicia continúan avanzando a bo ritmo e hoxe
quedará completado o fresado de toda a contorna.

Coas obras de reforma e peonalización da Praza da
Galicia e a súa contorna avanzando a bo ritmo, o alcalde da Estrada confirmou hoxe a
decisión de empedrar na súa totalidade a Rúa Don Nicolás, completando así a
intervención realizada no seu primeiro tramo, ata a confluencia coa Rúa Marqués de la
Vega de Armijo.
Deste xeito, a rúa ampliará o seu empedrado actual ata chegar á Praza da Inmaculada, de
xeito que toda a vía quede configurada coa mesma estética, idéntica á tamén aplicada en
Marqués de la Vega de Armijo, de xeito que toda a contorna lucirá en pedra.
A diferenza estará no tránsito: mentres o primeiro tramo será completamente peonil, a
parte da Rúa Don Nicolás na que agora se traballará estará aberta á circulación,
recollendo o fluxo de vehículos procedentes de Marqués de la Vega de Armijo que
avancen cara a praza que preside a igrexa parroquial de San Paio para continuar pola Rúa
San Antón.
Por outro lado, o alcalde referiuse ás obras que se están realizando logo de teren
pechado ao tráfico a Praza de Galicia días atrás. O rexedor sinalou que, tal e como se
avanzara, as obras de fresado de toda a contorna quedarán rematadas hoxe e será
momento comezar co soterramento dos servizos (pluviais, novas conexións eléctricas ou
regos da zonas verdes) para logo aplicar a toda a superficie un formigón de limpeza.
En todo caso, a Rúa Irmáns Valladares continuará funcionando como alternativa para os
vehículos que, dende a Avenida Benito Vigo, soben por Pérez Viondi dirección Avenida
de América. Esta foi a medida que se adoptou dende este mesmo martes, buscando que
o peche da Praza de Galicia ao tráfico xerase as menores molestias posibles.

O Concello mantén a intención de reabrir a Praza de Galicia ao tránsito para o Entroido,
de xeito que este espazo poidan empregarse con normalidade durante os desfiles do
luns 16 e martes 17 de febreiro.