A Estrada na Rede

A axencia estradense Actual Comunicación convoca a primeira
edición dos Premios Rebumbio no I Certame da Comunicación Dixital
Local. Trátase duns galardóns que buscan distinguir, por primeira
vez, a comunicación dixital realizada na Estrada. O fallo e entrega
dos premios terá lugar o 29 de marzo no Museo do Moble e da
Madeira (MOME) da Estrada a partir das 13.30h.
En concreto, un xurado profesional será o encargado de escoller tres
finalistas, dos cales saíra un gañador, para cada unha das seguintes
5 categorías:
Mellor uso do galego en redes sociais. Categoría na que se
premiará o correcto emprego do idioma galego no espazo dixital.
Mellor uso do humor como recurso comunicativo. Esta categoría
premia ás persoas, colectivos ou iniciativas que destacasen pola
súa creatividade e talento utilizando a comunicación como
ferramenta para entreter, conectar e provocar sorrisos.
Mellor iniciativa local en redes sociais. Categoría que ten por
obxeto a selección daquela actividade ou iniciativa que mellor
funcionamento ou resultados acadase en redes sociais,
entendidos estes no senso da visibilidade ou o alcance do público.
Mellor difusión da vida estradense. Este galardón premia a
aquelas persoas, entidades ou iniciativas que contribuísen de
maneira destacada a dar a coñecer, promover e poñer en valor a
vida, as tradicións, a cultura e a identidade da Estrada.

Mellor difusión de negocio local en redes sociais. Este premio
recoñece a empresas, emprendedores ou profesionais que
destacasen pola súa estratexia en redes sociais para
promocionar o seu negocio na Estrada.
O xurado está conformado por tres profesionais estradenses de
recoñecido prestixio no sector: Laura Alonso, Xefa de Planificación de
medios dixitais e offline en Avante Evolución de Medios; Fran Brea,
redactor de La Voz de Galicia no Barbanza e Kike Vázquez, técnico de
Cultura do Concello da Estrada. Ademais, Actual Comunicación
outorgará de xeito directo o Premio Xove Promesa en Comunicación,
categoría que busca premiar a incorporación dos máis novos á
actividade comunicativa profesional.
Cabe sinalar que os 3 finalistas de cada categoría destes Premios
Rebumbio, que se conciben con idea de continuidade, se darán a
coñecer a partir da vindeira semana a través das redes sociais do
propio galardón.
10º aniversario e Xornada “Transformación da Comunicación
e Redes Sociais”
Este certame encádrase na xornada divulgativa “Transformación da
Comunicación e Redes Sociais”, que Actual Comunicación organiza
con motivo do seu 10º aniversario. Neste encontro, reuniranse
profesionais da comunicación chegados de toda Galicia para abordar
cuestións coma a evolución da comunicación, o impacto das redes
sociais, o emprendemento no eido local ou o futuro da comunicación
e as redes sociais.
Esta actividade terá lugar o 29 de marzo no MOME entre as 09.30 e
as 13.30h, momento no que se dará paso á entrega dos Premios
Rebumbio (adxúntase cartelería co detalle da xornada).

 O Concello emprende os traballos de mantemento e actualización das
instalacións, que se sumarán ao labor de selección e catalogación dos
fondos previos á reapertura
 O proxecto de obras, por máis de 40.000 euros, contempla actuacións de
mellora no exterior e interior do inmoble, que se prepara para un novo
discurso museístico
 A última estimación calcula que os fondos do centro superan as 2.000
pezas, de carácter etnográfico, arqueolóxico, pictórico e fotográfico

– Operarios do Concello da Estrada traballan xa para
emprender o acondicionamento interior do Museo do Pobo Estradense coa pretensión
de que as instalacións reabran as súas portas ao público no segundo semestre deste ano,
tal e como adiantou o alcalde, Gonzalo Louzao Dono, nunha comparecencia realizada co
director do museo, Juan Andrés Fernández Castro, no remate de 2024.
O rexedor explicou que os traballadores municipais realizan estes días labores de
retirada de material que non se empregará na nova etapa que nos próximos meses
comezará o tamén coñecido como Museo Reimóndez Portela,na honra e lembranza do
humanista de San Miguel de Castro.
Antes de abrir as súas portas de novo tras anos de peche, estas dependencias municipais
teñen que someterse a traballos de actualización e mantemento. O Concello reservou
para este fin máis de 40.000 euros. En liñas xerais, con estes fondos realizarse un
acondicionamento da carpintería exterior -o edificio ten fiestras de madeira-, farase un
pintado das diferentes estancias e tamén se chegará co traballo de mellora ás zonas
axardinadas do recinto, coa pretensión de que o discurso museístico poida abrirse ao
exterior.
O Museo do Pobo Estradense trasladouse ó edificio que ocupa actualmente no ano
1996, na sede do antigo Matadoiro Municipal. Nos últimos anos o edificio foi obxecto
dunha actuación de mellora estrutural e de renovación da cuberta. Agora,co obxecto de
proceder á apertura do museo ao público, xurde a necesidade de realización dalgunhas
actuacións menores tanto no interior como no exterior do inmoble para garantir o
óptimo estado de conservación da obra e que estas instalacións volvan a abrir as súas
portas.
As obras
No exterior contémplase a restauración das carpintarías de madeira mediante un
decapado do verniz existente en mal estado, con posterior lixado, vernizado e selado.
Pintaranse as reixas situadas tanto nas carpintarías como no peche da parcela e
limparanse os muros de pedra do edificio e do peche da parcela. Aproveitarase a obra
para a retirada de sedimentos da zona empedrada a sementarase herba na área
axardinada.
Xa no interior, as obras contemplan a substitución do cadro eléctrico; lixado e
empastado de paramentos interiores deteriorados pola humidade; aplicación de pintura
plástica satinada e a formación dun falso teito de cartón xeso no despacho situado na
planta alta.
Depuración e catalogación dos fondos
Co procedemento de reapertura en marcha faise preciso un proceso de selección e
depuración do material dispoñible no centro, froito das moitas doazóns que o Museo do
Pobo Estradense foi recibindo nos seus anos de historia, con materiais de ampla
diversidade. “Temos moito e hai que seleccionalo”, asumiu o alcalde da Estrada, Gonzalo
Louzao, que fixo fincapé en que se abre un tempo para a catalogación e ordenación dos
fondos de cara a distribuílos para a súa exhibición.
Arestora é difícil calcular o número de pezas que figuran no haber do museo estradense,
se ben a última estimación barallada pola dirección apunta a que pode estar por encima
das 2.000. Entre elas figuran moitas pezas etnográficas (algunhas vencelladas ao traballo
do liño, á labranza ou á tornaría), arqueolóxicas, pictóricas ou fotográficas. Contan as
instalacións con cadros de Laxeiro, Colmeiro, Castelao, Miguel Docampo, Xesús Muras,
Fragoso, Ángel Lemos de los Reyes, Morales, Ramiro Cimadevila, Jano Sanmartín, Susana
Pazo Maside, Santiago Tato, José María Barreiro ou Daniel Cifuentes. No fondo
fotográfico existen negativos de Ovidio Piso ou Celestino Fuentes, entre outros.
Súmanse ao legado que poderá exporse maquetas a escala da antiga e desaparecida
igrexa ou o Cruceiro da Estrada.
Un novo discurso
Cando se completen as obras de mantemento e a catalogación e colocación dos fondos
poderá coñecerse o novo percorrido por este mostrario histórico da Estrada. A priori, a
sala central reservarase como “parte nobre” da instalación, escolléndose como espazo
para a exhibición dalgunhas das pezas máis destacadas do fondo. A nave lateral
esquerda sería a etnográfica e, a dereita, concíbese como zona para situar a antiga
escola con que conta o museo, xunto con xoguetes e outros moitos artigos vencellados á
infancia. A idea é que no piso superior, o despacho de dirección e sala de investigadores
se sitúen á esquerda, reservando a dereita como zona para fondos que se vinculan a
estradenses ilustres

 O goberno aproba iniciar o procedemento para a contratación das
obras, cun investimento próximo aos 140.000 euros
 Actuará na alameda, parque de Figueiroa, Praza da Feira, zona
axardinada da Baiuca, un illote en Toedo, rotonda de entronque da
Avenida de Santiago coa Rúa da Cultura e toda a mediana desta última
 Nos xardíns municipais instalaranse unhas letras corporativas co texto
iluminado “A Estrada”, a xeito de futuro ‘photocall’ do municipio

O Concello da Estrada afronta o proceso de
contratación para un plan de acondicionamento das zonas axardinadas do casco urbano,
unha actuación que busca mellorar a estética de distintos enclaves da capital
estradense, profundado tamén na mellora da imaxe que proxecta a vila para veciños e
visitantes coa incorporación de novos elementos nalgúns dos espazos máis céntricos. O
asunto estivo enriba da mesa este luns, na reunión da Xunta de Goberno Local, que
aprobou iniciar o expediente para a licitación das obras, enmarcadas no Plan +Provincia
da Deputación de Pontevedra de 2024. O investimento previsto ascende a 140.000
euros.
O plan suporá executar un acondicionamento profundo en sete áreas axardinadas do
casco estradense: a alameda municipal, o parque de Figueiroa, a Praza da Feira, a zona
axardinada da Baiuca (diante do heliporto a carón do centro de saúde), o illote de Toedo
(próximo á estación de servizo existente), a rotonda de entronque da Avenida de
Santiago coa Rúa da Cultura e toda a mediana axardinada desta última.
• Zona axardinada da Baiuca. Traballarase sobre unha superficie de 320 metros
cadrados, xusto entre o heliporto e o centro de saúde, a estrada N-640 e o
parque canino municipal. Previa preparación do terreo, xa que este espazo está
actualmente sen acondicionar, crearase un xardín con árbores e diferentes
plantas ornamentais.
• Illote de Toedo. Axardinamento en 270 metros cadrados, tamén con
preparación previa do terreo, instalación de malla antiherbas e subministro e
plantación de gran cantidade de especies diferentes. Esta área atópase ao pé da
estrada autonómica PO-841, que une A Estrada coa capital galega, polo que será
un escaparate na entrada ao casco urbano dende Compostela.
• Rotonda de entronque da Avenida de Santiago coa Rúa da Cultura. A actuación
supón preparar o terreo para o posterior subministro de 113 plantas arbustivas
variadas (lavanda, salvia e similares), coa instalación do correspondente rego
automático para superficie.
• Mediana axardinada de Rúa da Cultura. É un espazo lineal, con 12 tramos
alternos de 10 metros de lonxitude cada un. Entre les quedarán zonas
intercaladas de céspede. Colocaranse plantas para embelecer este paseo entre
diferentes esculturas dedicadas a persoas distinguidas en sucesivos Anos
Culturais do Concello da Estrada.
• Xardíns municipais. Neste caso o plan contempla actuar nun espazo que linda
coa Avenida Benito Vigo, un montículo de céspede que se entende apropiado
para a instalación dunhas letras corporativas co texto “A Estrada”, de
aproximadamente un metro de altura colocadas sobre unha axeitada e estética
base. Este cartel será iluminado con led RGB, coa vocación de que se converta
nunha sorte de ‘photocall’ do municipio.
• Praza da Feira. Sobre os parterres creados na última remodelación deste
enclave, proxéctase afondar na limpeza e reposición de plantas salpicando todo
o entorno, incorporando casca de piñeiro para evitar que medren malas herbas.
• Parque de Figueiroa. Procederase á eliminación de ramas baixas nas especies
existentes, contemplando tala de árbores en mal estado, eliminación de
arbustos e da Callystemun existente no acceso para a súa reposición con
especies arbustivas. Farase un escarificado e sementarase a pradeira existente.
“Os procesos de humanización e de mellora das zonas verdes e axardinadas que salpican
o casco urbano están ao servizo de mellorar a imaxe da vila para goce e esparexemento
dos cidadáns. Queremos que os estradenses se movan por un casco urbano que lles dá
protagonismo fronte ao tráfico, no que poder pasear ou pasar o seu tempo de ocio
nunhas condicións máis confortables e esteticamente más amables”, dixo o alcalde da
Estrada, Gonzalo Louzao. Engadiu que estas intervencións tamén terán incidencia na
propia imaxe que A Estrada proxecte cara os visitantes. Indicou o rexedor que o prazo
previsto para que se executen as obras é de dous meses.
Pola súa banda, o edil delegado de Parques e Xardíns, Óscar Durán, engadiu que toda
esta actuación de mellora verase ampliada e complementada con outros proxectos que
buscarán embelecer a vila. Nalgúns casos serán accións que incidirán sobre estas zonas
nas se actuará con cargo a este Plan +Provincia e, noutros, serán iniciativas que chegarán
a outras áreas do casco urbano nas que a cor verde é tamén compoñente estética
protagonista.

 Os departamentos de Secretaría e Intervención estudan como repercutir
o incumprimento por parte da firma que gañou o concurso público
 O “contrato suculento” elevou este ano o número de empresas
presentadas. “Non podemos vetar a ningunha candidata por ser de
fóra”, sinala o goberno
 “Ninguén pode dubidar de que o Concello da Estrada é o primeiro
interesado en que esta comida a sirva unha empresa local. Facer
cinismo político está moi ben, pero eu como alcalde non podo dirixir os
contratos”, di Louzao
 Recoñecen que a adxudicataria non incorreu en baixa temeraria e que a
súa oferta tiña unha diferenza de 50 céntimos por menú con respecto á
seguinte licitante, da Estrada

“Normalmente, cando se acaba unha comida, dáselle un
aplauso ao cociñeiros. Hoxe, o aplauso é para todos vós”. Micrófono en man, o alcalde da
Estrada, Gonzalo Louzao Dono, non quixo este sábado esquivar as pertinentes explicacións
durante a celebración da Festa do Maior, despois de que o segundo prato do menú non chegase
ao seu debido tempo para preto de 50 das máis de 700 persoas congregadas no anexo do
pavillón Coto Ferreiro. O xefe do executivo local esixiu in situ respostas por parte de xerente da
empresa que gañou o concurso aberto convocado, consonte á lei de contratación pública, e a
primeira hora desta mañá mantivo unha reunión cos departamentos municipais de Secretaría e
Intervención. Ao remate, anunciou que o Concello penalizará á adxudicataria.
“Estamos depurando responsabilidades en base ao contrato, analizando as penalizacións que se
lle poden establecer á empresa por incumprimento do contrato, tanto pola cantidade de comida
servida como porque houbo persoas, preto de 50, ás que non lle serviron o segundo prato e
houbo que ir buscar comida fóra, algo que é completamente intolerable”, dixo o mandatario.
“Os contratos están para cumprilos”, engadiu.
Louzao Dono non pasou por alto as críticas vertidas polo grupo municipal do PSOE. En todo caso,
non quixo entrar a rebater as palabras do seu portavoz, Luís López, e limitouse a facer fincapé en
que “evidentemente, ninguén pode dubidar de que o Concello da Estrada é o primeiro
interesado en que esta comida a sirva unha empresa local”. “Facer cinismo político está moi ben cando interesa, pero eu como alcalde non teño a capacidade de dirixir o contratos. A
contratación pública vai á plataforma xeral do Estado. Cando sae mal está moi ben sinalar co
dedo ao alcalde pero, por sorte, as empresas da Estrada traballan moito e ben fóra da Estrada. Se
os demais municipios non permitiran o acceso a estas empresas que traballan de luxo e levan o
nome da Estrada polo mundo adiante, só traballarían un día ao ano co contrato deste Concello.
Polo tanto, non era posible vetar a ningunha empresa por ser de fóra”, remarcou o rexedor.
Louzao recoñeceu que o deste ano foi un “contrato suculento” que atraeu a máis empresas das
habituais no proceso de licitación. Asumiu que a firma que resultou adxudicataria non incorreu
en baixa temeraria e gañou o concurso cunha diferenza de só 50 céntimos por menú con
respecto á seguinte licitante, que resultou ser unha empresa estradense.
“O problema foi que non se cumpriu. Eu estou triste, non polo que diga o señor López Bueno
dende o PSOE, senón porque hai 700 persoas que, coma o concello, tiñan unha expectativa nesta
comida que non se cumpriu”, sinalou o alcalde. Avanzou de seguido que os departamentos de
Secretaría e Intervención están analizando como “aplicar todo o peso que se poida para
penalizar á empresa”. “Poremos as trabas, pero non podemos devolver a cantidade e a calidade
da festa que pretendía ser unha homenaxe para os nosos maiores”, dixo.
“Reflexión” para o PSOE
Finalmente, Louzao Dono fixo alusión ao conflito xerado “dirixidamente por parte do PSOE”, ao
que lle pediu “unha reflexión”. O rexedor local cuestionou aos socialistas non ter revisado
noticias como as referidas ao contrato aberto que tamén tivo que facer no seu día o Concello de
Lugo para a celebración do San Froilán. Lembrou que o procedemento rematou cunha empresa
de Madrid como adxudicataria, “co conflito que se xerou para as empresas de alí ou cos
comentarios de que no San Froilán, tal como di o señor López Bueno, se sirve polbo de Madrid”.

 Será no MOME, entre as 19.00 e as 21.00 horas
 A convocatoria trata de dar a coñecer a realidade destas nenas e nenos,
sensibilizar á sociedade e procurar familias interesadas en constituírse
en referentes estables e protectores para estes cativos

O departamento de Servizos Sociais do Concello da Estrada
promove para este xoves, 13 de marzo, unha charla informativa sobre o programa de
acollemento familiar En Familia, pensado para nenas, nenos e adolescentes que residen en
centros de protección e non dispoñen de alternativas familiares. A sesión formativa celebrarse
na Sala Mome, entre as 19.00 e as 21.00 horas.
A charla informativa trata de dar a coñecer a realidade destas nenas e nenos, sensibilizar á
sociedade e procurar familias interesadas en constituírse en referentes estables e protectores
para estas nenas. O obxectivo é evitar ou poñer fin a longas estancias nos recursos residenciais
para favorecer o adecuado desenvolvemento da nenas e nenos, contribuíndo na reparación do
seu dano.
Dende En Familia explícase que a protección da infancia en risco ou desamparo motiva, en
moitos casos, a asunción da tutela ou da garda por parte da Administración e, se ben as leis
establecen a prioridade do acollemento familiar sobre o residencial, a realidade amosa que un
alto número de nenas e nenos permanecen por longas tempadas en centros residenciais
(aproximadamente o 42% das situacións de tutela e garda).
En familia ocúpase, de xeito especial, daquelas nenas e nenos que levan máis tempo residindo
nos centros e para os que, en moitos casos, o futuro pasa por continuar no recurso de protección
ata a maioría de idade para retornar á familia de orixe nas mesmas condicións de desprotección.
Indican que habitualmente estes cativos teñen máis de 7 anos, moitos chegando ou xa entrados
na adolescencia, e precisan crecer nunha familia onde desenvolverse en plenitude, sentíndose
queridos, respectados e protexidos.
O programa forma parte da estratexia de desinstitucionalización e fomento do acollemento
familiar da Consellería de Política Social e Xuventude da Xunta de Galicia e conta co seu apoio e
financiamento a través dos fondos NextGeneration da Unión Europea.

Dende o departamento que dirixe a edil Amalia Goldar animouse hoxe aos estradenses a
achegarse ata esta charla informativa o vindeiro xoves para coñecer, de primeira man, o
funcionamento do programa para favorecer esta protección ás nenas e nenos que a precisan

Achegará o seu espectáculo Síntese Horizonte  para o público estradense. As entradas están á venda na plataforma Entradium

A artista Guadi Galego achega por primeira vez o seu espectáculo Sintese Horizonte á Estrada, nunha cita no Teatro Principal que comzará ás 21 horas. As entradas xa están á venda na plataforma Entradium.

Síntese Horizonte é unha proposta expresamente concibida para teatros, na que Guadi Galego se acompaña de grandes artistas do país. É o caso da banda conformada por Guillerme Fernández (guitarra acústica eléctrica e sintetizada), Rubén Iglesias (baixo e sintetizadores), Isaac Palacín (batería e percusión) e Álex Fernández (teclados). Completan a formación, como vocalistas e pezas chave do directo, Paula Romero, Faia Díaz, Inés Salvado e Rocío Jiménez.

Guadi Galego xa percorreu os principais escenarios de Galicia con este espectáculo. A cita na Estrada forma parte da xira de despedida de Síntese Horizonte, que celebrará o seu último concerto no mes de outubro en Compostela.